Placet à une dame. Vincent Voiture.
PLACET A UNE DAME
Plaise à la duchesse tres-bonne,
aux yeux tres-clairs, aux bruns cheveux,
reyne des flots de la Garonne,
dame du Loth et de tous ceux
qui virent jamais sa personne.
De laisser entrer franchement,
sans peine et sans empeschement,
un homme au lieu de sa demeure ;
qui, s’ il ne la voit promptement,
enragera dedans une heure.
On a pour luy trop de rigueur
chez-vous, et tout haut il proteste,
que par un larcin manifeste,
on retient son ame et son coeur,
et que l’ on ne veut pas le reste.
L’ un est dedans, l’ autre dehors,
et l’ un et l’ autre est tout en flame ;
il est raisonnable, madame,
ou que l’ on reçoive son corps,
ou que l’ on luy rende son ame.
Il se voit pris comme au lacet,
et souffre un estrange supplice ;
mais le pauvret est sans malice,
ne refusez-pas son placet ;
car sans doute il est de justice.
Il a trop souffert de moitié ;
au nom de sa ferme amitié,
consolez son ame abbatuë,
ou dites, au moins, par pitié
à vostre suisse, qu’ on le tuë.
Vincent Voiture (1597-1648).
